مكتبة أغاني الفنان "جمال فرفور"

اذهب الى الأسفل

مكتبة أغاني الفنان "جمال فرفور"

مُساهمة من طرف dr.sudani في السبت أكتوبر 04, 2008 3:51 am



السلام عليكم ورحمه الله وبركتوو

كيف الحال ياشباب اليوم اقدم لكم كلمات اغانى الفنان جمال مصطفى الملقب


جمال فرفور
.................................................. ..............................................



أجسامنا ليه جسمين ..
روحنا واحده وكيف اتقسمت قسمين
شي عجيب في غرامك يافريع ياسمين
أنا يا حبيبي تجدني على هواك أمين
وما بيعجز عن أفكاري في التخمين
حواسي تحسد نظري في حسنك منتظمين
شمالي تاخده الغيره اذا جلست يمين
من المنام ما معاي ولا السته من ستين
عندي التلت من عقلي وعندك التلتين
سايقاني بسمة فاهك در عقيد ومتين
لولاها مالي صالح في الظلال والتين
يالفريد في ظرفك زي صداقتك وين
ما أظن تكون ولا بدعت قبل في التكوين
يامن أسرت فؤادي ملكته في اليدين
ياملفت الأنظار يا ناير الخدين
نحن الجميع مادمنا قلوبنا متحدين
تبقى الصداقه قرابه ونكسب الودين









خلي القسوه
ما قلنا ليك خليها
النظره دي خليها
اللفته دي خليها
القسوه ما تسويها
عارفينا طبعك لين
واصلك عطوف وحنين
بين حنانك لي
ارواحنا ما تجافيها
البسمه زايده حلاتك
والرقه احلا صفاتك
الجفوه ما من ذاتك
ما بتشبهك خليها
انت الامل والمنيه
ضحكاتك اجمل غنيه
يا احلا زول في الدنيا
وكل الحنان الفيها
عارفني لمن تزعل
والله ما بتحمل
احوالي ليك تتبدل
يبقى الحزن كاسيها
ازيد وازيد في حبك
وافرش ورود في دربك
اقول احنن قلبك
ديارنا تاني تجيها
خليك معاي واتدلل
للفرقه ما تستجعل
ده البينا ما بتحول
لو كنتا يوم ناسيها
اهديك غناي للذكرى
خليهو زاد لي بكره
اصلو الغرام والفكره
انك تكون حاسيها
ما قلنا ليك خليها
النظره دي خليها
اللفته دي خليها
القسوه ما تسويها










فى الحالتين انا ضايع




لا بعدك بفرحني لا قربك بريحني
في الحالتين أنا ضايع ما لاقي اللى ينصفني
أقول أنساك أفوت لي دنيا ما دنياك
يسرح قلبي في ذكراك تاني الشوق يرجعني
أتعب و أشقى برضي معاك
في الحالتين أنا ضايع و مالاقي البينصفني
لابعدك بفرحني
سنين والحزن مالكني
لمن قلت أنسى هواك أشوف غيرك ينسيني
لقيتك انت في قلبي
انت زاد دربي بعدك ما بفرحني
قربك ما بريحني في الحالتين انا ضايع
ومالاقي البينصفني لابعدك بفرحني
أتخاصمنا كم مرات واتراجعنا كم مرات
أتعاهدنا ننسى الفات
نطوي الماضي في صفحات
صفحة جديدة ما تكمل ترجع تاني تجهلني
لا بعدك بفرحني








مشكلة
إسحاق الحلنقي
الروح تروح ما مشكلة ..
تزيد جروحى علي جروح ما مشكلة ..
ينسى الفراش عطر الربيع ما مشكلة ..
ينسى الوديع صوت الوديع ما مشكلة ..
الشاري لو فكر يبيع لو ضاعت الاعمار تضيع ما مشكلة ..
لاتبين شمس لايهل قمر ما مشكلة ..
يبقى السحاب من غير مطر ما مشكلة ..
يرموني في نص البحر تجيبو لي الناس خبر ما مشكلة ..
لو هز صمت الليل برق ما مشكلة ..
والقاش رحل خلا الشرق ما مشكلة ..
لو عمري بالشوق يحترق لو رحت ما جبت الفرق ما مشكلة ..
الدنيا تبقى بدون جليس ما مشكلة ..
تبقى الليالي بدون ونيس ما مشكلة ..
وتنسى ليلى حبيبا قيس ما مشكلة ..
وتنسى العروس اسم العريس ما مشكلة ..
المشكلة
ريدتك بقت هى المشكلة
أدينى حل للمشكلة









انت مافي .
اي حاجة بتبقى مافي
الشمس تلقاها مافي
والبحر من غير مرافي
والمدن بتكون منافي
والحبيب يبقى جافي
العسل ما ببقى صافي
وانت مافي
انت مافي الروح تفارق
ويبقى موج النيل مفارق
الشروق ينسى المشارق
والنسيم لي الروض يشاهق
والصباح ما ببقى شارق
وانت مافي
انت مافي منو البسالم
ويبقى من الامو سالم
الزمن يصبح مظالم
والحنين يبقى ظالم
وتمسح الأحزان عوالم
تفتح الاحزان عوالم
وانت مافي
انت مافي الناس تغيب
والحبيب ينسى الحبيب
الدمع يصبح قريب
والطبيب ما ببقى طيب
كيف يكون في الدنيا طيب
وانت مافي
avatar
dr.sudani
رئيس المنتدى
رئيس المنتدى

عدد الرسائل : 295
العمر : 29
الأوسمة :
تاريخ التسجيل : 03/10/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أغاني الفنان "جمال فرفور"

مُساهمة من طرف dr.sudani في السبت أكتوبر 04, 2008 3:56 am

لا بعدك بفرحني لا قربك بريحني
في الحالتين أنا ضايع ما لاقي اللى ينصفني
أقول أنساك أفوت لي دنيا ما دنياك
يسرح قلبي في ذكراك تاني الشوق يرجعني
أتعب و أشقى برضي معاك
في الحالتين أنا ضايع و مالاقي البينصفني
لابعدك بفرحني
سنين والحزن مالكني
لمن قلت أنسى هواك أشوف غيرك ينسيني
لقيتك انت في قلبي
انت زاد دربي بعدك ما بفرحني
قربك ما بريحني في الحالتين انا ضايع
ومالاقي البينصفني لابعدك بفرحني
أتخاصمنا كم مرات واتراجعنا كم مرات
أتعاهدنا ننسى الفات
نطوي الماضي في صفحات
صفحة جديدة ما تكمل ترجع تاني تجهلني
لا بعدك بفرحني









روحي ملكك ولا ملكي
سيبني أبكي..سيبني أشكي
غير تبكي الناس وحاتك
عمري ما شفتك بتبكي
لو تجيب القمرة ليا
والشمس ما بين ايديا
مستحيل تقبل عينيا
ترضى من عندك أسية
تبقى واهم لو تفكر تاني تتحكم عليا
ليك زمانك ولي زماني
انت مالك ومال حناني
وليه عليك أبني الأماني
الأماني مضيعاني
سيبني وحدي مع دموعي
أبكي مرة و أبكي تاني
خوفي يا ظالم حبيبك
دمعة المظلوم تصيبك
أحسن أبعد من طريقك
وأقفل الباب البجيبك
و لو بكيت خليني أبكي
ومن دموع عينيا سيبك
روحي ملكك









يا حمامه.....


يا حمامه مع السلامه ظللت جوك الغمامه

طيري في جوك المعطر
وانشدي شعرك المسطر
قولي للشادن المبطر
زيد دلال وزيد وسامه

انشدي شعري بين دورو
علو يذكرني في خدورو
اوعي يلعب عليكي دورو

يا حمامه مع السلامه ظللت جوك الغمامه

اسأليهو عن المحبه
وعن فؤادي الذي احبا
ليتو يسأل عن الاحبه
مره في عمرو يا حمامه

يا حمامه مع السلامه ظللت جوك الغمامه


الغرام ناسي فيهو ذاتي
فيهو خاطرتا بي حياتي
اين حبي وذكرياتي
اصبحت روحي مستهانه

يا حمامه مع السلامه ظللت جوك الغمامه


كلميني عن الموده
كيف ضاعت وكيف صد
بعد ذلك اذا استبدا
0قابل الجا بي ابتسامه

الجمال يا حمامه فاتن
فيه اروع من المفاتن
كل من يعشق المحاسن
قل ان يوجد السلامه

يا حمامه مع السلامه ظللت جوك الغمامه








افتتـــــــــــــــــــــــــــــــــــتان


لى حق اذا اتهمتا فؤادى عندك انتا ياحبيبى انا بيك افتتنتا
***************
حبيب الروح سلمتا ما بيا لوعلمتا
انا الامين ووافى وليك ودادى صافى
ياملهمى القوافى ولكل معنى وافى
ذى بسمة الازاهرفى نظرى ابتسمتا ذى نقشة الخواتم فى قلبى اترسمتا
ياحبيبى انا بيك افتتنتا
*****************
اقوليك اذا سمحتا انا شايفك حبيبى شايفك
انا شايفك تبهرج كل ما ليك لمحتا كضوء الفجر لحتا
كزهر الروضه فحتا وذى اغصانا محتا
ياحلو المناظر ياساحرالنواظر
ان نظروك فرحتا وان نظرتا جرحتا
يا حبيبى انا بيك افتتنتا

*******************
بدر الحسن انتا وبين الناس عرفتا ان وصفوا المحاسن بسيماهم وصفتا
انابعيونى شفتا وصادق لو حلفتا
من تاثير عيونك خديتنى ورجفتا ومن تاثير عيونى على خديك فقتا
انا انا انا نارى نار انا نارى تعال ياحبيبى
*********************
ولى حق اذا اتهمتا فؤاى عندك انتا يا حبيبى انا بيك افتتنتا








غنية رائعه..
كلمــات : اسحق الحلنقي
الحان : علي أحمــد
على صفق العنب اسميــن ..
كتبناهم بدمع العيــن ..
ومرت بينا غيمة فرقة ..
واتفارقنا مجبوريــن ..
ولمــا رجعنا من غربتنا ..
فرحانين مع العايديــن ..
لقينــا الريح محت ذكــرى ..
بكيــنا على ضيــاع اسميـن ..
كتبنا الاسامي زمان ..
واشهدي يا ضفــاف النيـل
طفولتنا القضيناها ..
زغاريد فرحة شاقة الليل..
سنينا تضوي بالآمال ..
وكــل العشنا زاهــي جميل ..
ماشيــن في دروب الريــد ..
نغنــي والأماسي تشيــــل ..
جاتنــا الفرقة زايرة ديارنا ..
في ليلة اللي ما بتنــدار ..
مدت ايــدا شالت زهــرة ..
كانت ضاوية ساحة الــدار ..
خلت بيتــنا لا ضو شمعة ..
لا حــس فرحة لا نــوار ..
سواقيــنا الحنــينة بكت ..
علــى الريـــد الولفــنا صغــار ..
كبرنـــا الليــلة جيــنا نشــوف ..
حكاية حزيــنة لي قلبيــن ..
كنا رسمناهم على صفق العنب اسمــين ..
قايــلين نلقى ماضي الذكرى ..
فوقنا يلالي زي نجميــن ..
لقينــا الريــح محا الذكـــرى وبكينا على ضيـــاع اسميــــن
وبكيـــــــــــــــنا على ضياع اسميـــن









الما بعرفك
يا قلبي في طبعك ملك .. سامحت كل البدلك
ما عرفو آخرك وأولك .. والما بعرفك بجهلك
يا قلبي دايماً مبتسم .. مهما تعاني وتنظلم
الدنيا أبداً ما بتهم .. فرحك عذابك منقسم
مهما براك عشت الشقا .. الحلوة برضك تعشقا
من غير حليفة تصدقا .. ما بتشكي نارا المحرقة
يا قلبي لو زمنك قسا .. لي وعدو اتنكر نسى
الدمعة دايماً أحبسا .. وكلمة ملام ما بتهمسا
يا قلبي شيل جمر الصبر .. همك سحابة صيف تمر
مدام في باقي من العمر .. أيامك الجاية بتسر








بسماتي

يا الحارم نومي و بسمـــاتي ..
يطول في غيابك أناتـــــــــــي ..
لو كان أنا لي عندك خاطر
رجع وحياتك فرحاتي ..

نسيان الريد عندك ساهل ..
وأكتر من كده تعمل زعـــلان ..
لو كنت معاك أنا متساهل ..
وبعامل فيك بي روح فنان ..
ما تجرح احساسي المرهف ..
انا برضك في الآخر انسان ..

بكرة الأيام حتوريك ..
كيفن لو كنت معاي ..
أنا رغم قساك كنت بأمل ..
في يوم حتحس بالجواي ..
أصلي وحاتك ما بتألم لو طيفك فارق دنيايا ..











وقفه مع كلمات اسحاق الحلنقى هذا المبدع صاحب الكلمات الساحره


غربة وشوق / اسحاق الحلنقي


غربة وشوق
جيناكم يا حبايبنا
بعد غربة و شوق
نغالب فيه ويغالبنا
ونكتم أهة
تظهر أهة
تتعبنا
حنين لشوفة الغالين
مدوبنا

هناك ما هنتنا يا حلوين
الهم بدل واحد يبين همين
وفيها قلوبنا
تتأوه ونتاوه
سنين وسنين
مصيره الحى يلاقى حبايبه
لو صادقين

سماع أهلا
من الاحباب شروق أمال
ووصف البهجة بالكلمات
محال يتقال
حلاوة العودة
غنيناها فى موال
تحكى عن الولف
واصلة الولف كتال








بتتعلم من الايام
--------------------------------------------------------------------------------
بتتعلم من الايام مصيرك بكره تتعلم
وتعرف كيف يكون الريد وليه الناس
ليه ليه بتتــــالـــم
متين عرف الهوى قلبك
متين فاضت بااهات متين سهر
عيونك ليل طويله ساعات
وحاتك لسه مابتقدر تقاسم قلبى دقاتو
اقابلك وكلى حنيه واخاف من نظرتك لليا
واخاف شوق العمر كلو يفاجئك يوم فى عينيه
ورى البسمات كتمت دموع وبكيت من غير تحس بيا
وبكره وبكره الريد الريد بدون مواعيد يزورك
ياحياة عمرى وتقول ياريتنى لو حبيت
زمان من بدرى
وتعال تعال تعال فرح ليالينا وتعال قبل
السنين تجــــرى








يا أعز الناس حبايبك نحن
زدنا قليل حنان
دا العمر زادت غلاوتو معاك
وصالحني الزمان
يا أحن الناس حنان
كنت من قبلك
بشيل الليل دموع
واطويه هم
انا كنت بخشى
على الأماني الطفلة
يفنيها العدم
وجيت لقيتك بين قلبي دموع
وغنيتك نغم
يا حبيب
ورد الأماني
الفي أعماقي فتح
وابتدا القلب
العاش العمر في آهاتو
يفرح
والزمن ماظنو بعدك انت
يرجع تاني يجرح
نامت أحزان عمري
غنى زماني
واتلاشت صعاب
أنا قبلك الأيام
قضيتا سراب
يسلمني السراب
وبيك طويت من عمري
صفحة ماضي مكتوب بالعذاب










هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف
تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنا
غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدة فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين تمن00











الريد جوّ قلبي بحبك بدا
ياطيبة حياتي يا قطر الندي
ما كان في خيالي تتنكر كدا
أيامن الجميلة ليه بتنكدا
جربت هواهم
قليبي انكوى
تاريهم جاروا
وماصانو الهوى
حاولت اسيبك واتناسى المضى
أيامك معاي ساعات الرضى
المكتوب علي أنا قلبي ارتضى
ياريت الليالي عطفو يعوضا
الكلمة الحنينة مشتاق اسمعا
روحي خلاص جفيتا والشوق لوعا
الدمعات
عيوني كيفن تمنعا
وانا شايف سنيني جورك ضيعا
يومي الشفتك انت حسيت بالهنا
طويت يا حياتي شمعاتي انا
بعد الحب دا كلو يا أجمل منى
لي بكيتني تاني عاودت الضنا
جربت هواهم
قليبي انكوى
تاريهم جاروا
وماصانو الهوى









ليه يا كروان خليت عشك
باريت الغربة البتغشك
فارقت البلد البتريدك
بالصندل كانت بترشك
ليه يا كروان سبت ديارك
ومشيت خليتهم سمارك
دي الغربة الحتت نوارك
ما تسيبها تقلل مقدارك
دا البعد الحاصل كان منك
ليه نرمي اللوم على اقدارك
ليه يا كروان خليت ناسك
ومشيت للناس الماناسك
انت المعروف بين جلاسك
معروف بي رقة احساسك
ليه تنسى عيون النيل والليل
والريد الحابس انفاسك





---------------- ومستني إضافاتكم ومشاركاتكم ----------------------
avatar
dr.sudani
رئيس المنتدى
رئيس المنتدى

عدد الرسائل : 295
العمر : 29
الأوسمة :
تاريخ التسجيل : 03/10/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى